चिकित्सा विधेयकमा तोडमोड गरे फेरि पनि अनसन बस्ने डा. केसीको चेतावानी
चिकित्सा शिक्षा सुधारका लागि आफूसंग भएको सम्झौतामा प्रधानमन्त्री केपी ओलीसंग छलफल गर्नुभएका प्रा. डा. गोविन्द केसीले अध्यादेश अनुसार नै चिकित्सा शिक्षा विधेयक आउनुपर्ने बताउनुभएको छ ।
छलफलका क्रममा उहाँले सहमति अनुसार चिकित्सा शिक्षा विधेयक आउनु पर्ने माग गर्दै त्यसमा तोडमोड गरे फेरि पनि अनसन बस्ने चेतावानी दिनुभएको छ ।
प्रधानमन्त्री ओलीले भने सहमतिअनुसार संशोधन दर्ता भएको र त्यो पास हुने आश्वासन दिनुभएको छ । छलफलका क्रममा प्रधानमन्त्री केपी शर्मा ओलीले डा केसीसँग भएको सहमति तत्काल कार्यान्वयन हुने बताउनुभएको थियो ।
प्रधानमन्त्री ओलीले सहमति कार्यान्वयनमा भइरहेको प्रगतिबारे शिक्षामन्त्रीसँग जानकारी लिने आश्वासन दिनुभएको थियो । उहाँले अन्य सहमति कार्यान्वयनका लागि डा. केसी समेत संलग्न भएको कमिटी बनाउने प्रस्ताव गर्नुभएको छ ।
तर, डा. केसीले भने आफू त्यस्तो कमिटीमा नबस्ने बताउनुभएको छ । उहाँले हामीले अरुलाई पनि विश्वास गर्नुपर्छ । कमिटी बनाउने हो भने हाम्रो प्रतिनिधि राख्नु भए हुन्छ भन्ने जवाफ दिनुभएको छ ।
प्रधानमन्त्रीलाई भेट्न डा. केसी आफ्नो वार्ता टोलीसहित बालुवाटार पुग्नुभएको थियो । भेटमा चिकित्सा शिक्षाबारे छलफल भएको र डा. केसीले आफूसँग भएको सम्झौता अनुसार नै विधेयक पास हुनुपर्ने नभए १६ औं अनसन बस्ने बताउनुभयो ।
