२ हजार जरिवाना तिरेर छुटे गणेश लामा
अनलाइन दर्पण
2021-06-11
पोखराको एक रेष्टुरेन्टबाट बिहीबार पक्राउ परेका डन गणेश लामा रिहा भएका छन् । निषेधाज्ञा तोडेर पोखरा आएको आरोपमा प्रहरीले उनलाई समाएको हो । उनीसहित ३ जनालाई प्रहरीले नियन्त्रणमा लिएर बैदाम प्रहरी चौकीमा राखेको थियो ।
राजनीतिक चलखेलका लागि पोखरा आएको आशंका गरिएका लामासहित तीन जनालाई जिल्ला प्रशासन कार्यालय कास्कीबाट शुक्रवार दिउँसो रिहा गर्ने आदेश आएपछि रिहा गरिएको नेविसंघ कास्कीका नेता सरोज केसीले जानकारी दिए ।
२/ २ हजार जरिवाना तिराएर उनीहरूलाई छाडिएको जिल्ला प्रशासन कार्यालय कास्कीले जनाएको छ ।
लामालाई तत्काल रिहा नगरे सडक आन्दोलनमा उत्रिने भन्दै कास्की काँग्रेसले यसअघि चेतावनी दिएको थियो ।
