भक्तपुरमा विद्यार्थी बोकेको बस दुर्घटना, ५९ जना घाइते सहचालक गम्भीर
अनलाइन दर्पण
2018-07-19
भक्तपुर । विद्यार्थी बोकेको बस दुर्घटना हुँदा ५९ जना घाइते भएका छन् । मध्यपुर थिमि नगरपालिका–९ निलबाराहीमा काठमाडौं मुलपानीस्थित क्रिश्चियन कम्यूनिटी स्कुलका विद्यार्थी बोकेर मध्यपुरतर्फ आउँदै गरेको बा १ क ९२५० नम्बरको बस दुर्घटना हुँदा विद्यार्थीहरु घाईत भएका हुन् । बस सडकबाट खेतमा पल्टँदा बसका चालक, सहचालक र ५७ जना विद्यार्थी घाइते भएका थिए ।
घाइतेमध्ये मध्यपुर अस्पताल थिमिमा ३५ जना र नागरिक कम्युनिटी अस्पताल गट्ठाघरमा २४ जनाको उपचार भइरहेको भक्तपुरका प्रहरी प्रमुख प्रहरी उपरीक्षक हिमालयकुमार श्रेष्ठले जानकारी दिए । उनका अनुसार विद्यार्थीको अवस्था सामन्य नै भएपनि गम्भीर अवस्थाका सहचालकको भने आइसीयुमा उपचार भइरहेको छ ।
उनले भने ‘घटनामा अहिलेसम्म कोही हताहत भएको छैन। घटनाको विस्तृत विवरण आउन बाँकी रहेको उनले जानकारी दिए ।
