हारको नैतिक जिम्मेबारी लिन राप्रपा अध्यक्ष थापाले दिए राजीनामा
काठमाडौं, १४ पुस। राप्रपाका पार्टी अध्यक्ष कमल थापा प्रतिनिधिसभा सदस्य निर्वाचनमा पराजित भएपछि राप्रपा मकवानपुर जिल्ला सभापति गणेश थापाले सभापति पदबाट राजीनामा दिएका छन् ।
कमल थापाका कान्छा भाइसमेत रहेका गणेश थापाले पार्टी अध्यक्षजस्तो राष्ट्रिय व्यक्ति मकवानपुरबाट चुनावमा पराजित हुनु जिल्लाका लागि अत्यन्तै दुर्भाग्यपूर्ण भएको बताएका छन् । अध्यक्षलाई चुनाव जिताउन सक्दो प्रयास गर्दा पनि नसकेकोमा आत्मग्लानी भएको भन्दै उनले हारको नैतिक जिम्मेबारी लिन पदबाट राजीनामा दिएकाे उल्लेख गरेका छन् ।
पार्टीको जिम्मेबारीबाट राजीनामा दिएपछि पार्टी र कार्यकर्ताको संरक्षण तथा हकहितका लागि सदैव तयार रहेको थापाले बताएका छन् । उनले निर्वाचनमा प्रत्यक्ष अप्रत्यक्ष सहयोग गर्ने शुभेच्छुक तथा मतदाताप्रति आभारी व्यक्त गरेका छन् ।
थापाले आफ्नो राजीनामा र पार्टीको हारबाट बिचलित नभई संगठन सुदृढीकरणमा लाग्न सबै कार्यकर्तामा आहृवानसमेत गरेका छन् ।
